Иқтидорҳои истеҳсолии Суғд самаранок истифода намешаванд

Душанбе, 5.03.2014 (АМИТ «Ховар», Зарангези Латиф).- Имрӯз раиси вилояти Суғд Абдураҳмон Қодирӣ бо мутахассисон ва роҳбарони корхонаҳои саноатӣ ва роҳбарони корхонаҳои пахтатозакунии вилоят  вохӯрӣ доир намуда, таъкид намуд, ки ҳадафҳои мақомоти иҷроияи ҳокимияти давлатии вилоят асосан ба се самт нигаронида шудаанд ва ин самтҳои афзалиятнок аз таҷдиди сохторҳои хоҷагиҳои калонҳаҷми кишоварзӣ ва бо ин васила ба деҳқон додани замин, навсозии роҳҳои дохилӣ ва рушди саноати сабуки вилоят иборат мебошад. Раиси вилоят ҳамчунин афзуд, ки барои тақвият бахшидан ба фаъолияти корхонаҳои саноатӣ то имрӯз бо намояндагони соҳаҳои гуногуни истеҳсолот мулоқотҳо доир  шуданд.
Дар ҷараёни вохӯрӣ муовини Раиси вилоят Хайрулло Маҳмадуллоев доир ба фаъолияти корхонаҳои пахтатозакунии қаламрави вилоят ҳисобот дода, дар такя ба маълумоти оморӣ изҳор дошт, ки  арзёбии вазъи соҳаи саноати сабуки вилоят дар соли 2013 собит месозад, ки иқтидорҳои истеҳсолӣ дар ҳафт соли охир афзудаанд, вале самаранок истифода намешаванд.
Дар ин вохӯрӣ ҳамчунин гуфта шуд, ки дар соли 2013 корхонаҳои пахтатозакунӣ 91 ҳазору 988 тонна пахта қабул намуда, 34 ҳазору 086 тонна нахи пахта истеҳсол намуданд. Яъне, иқтидорҳои мавҷуда ҳамагӣ 11,5 фоиз истифода шудаанду халос. Аз ин рӯ роҳбарони корхонаҳоро зарур аст, ки барои истифодаи самараноки иқтидорҳо тадбирҳои амалӣ андешанд.