Машварати роҳбарони ташкилотҳои қарзӣ дар БМТ

  Душанбе, 30.04.2014. (АМИТ «Ховар», Лайло Тоирӣ).- 28 апрел дар Бонки миллии Тоҷикистон бо роҳбарони бонкҳо, Ассотсиатсияи бонкҳои Тоҷикистон, Бюрои қарзӣ, Хазинаи суғуртаи амонати шахсони воқеӣ ва Ассотсиатсияи ташкилотҳои маблағгузории хурди ҷумҳурӣ машварати корӣ баргузор гардида, дар он роҳҳои сари вақт ва босамар татбиқ намудани дастуру супоришҳои Президенти ҷумҳурӣ ба Маҷлиси Олии Ҷумҳурии Тоҷикистон ва вазъи низоми бонкӣ дар семоҳаи якуми соли 2014 барррасӣ шуданд. Раиси Бонки миллии Тоҷикистон Абдуҷаббор Ширинов диққати роҳбарони бонкҳоро ба амалӣ намудани бандҳои Паёми имсолаи Сарвари давлат, ки ба афзоиши ҷамъоварии амонатҳо, паст кардани фоизи қарзҳо, таъмини дастрасии аҳолӣ ба сарчашмаҳои қарзӣ ва зиёд намудани филиалҳои ташкилотҳои қарзӣ дар маҳалҳо равона  шудаанд, ҷалб намуд. 
Тавре ки аз хадамоти бонк иттилоъ доданд, дар машварат масъалаҳои муҳими низоми бонкӣ, аз ҷумла, ҳамкории ташкилотҳои қарзӣ бо Бюрои қарзӣ ва истифодаи бонкҳо аз маълумотҳои он, пешгирии хавф ҳангоми додани қарзҳо, дастрасӣ ба қарзҳои хурд махсусан дар минтақаҳои дурдасти кӯҳистон, автоматикунии амалиёти бонкӣ, баланд бардоштани сатҳи дониш ва касбияти кормандони бонкҳо, таъмини сатҳи баланди ҳисоботҳо баррасӣ шуданд. 
     Роҳбарони бонкҳо ва дигар иштирокдорони ҷаласа бо мақсади боз ҳам хубтар кардани фаъолияти муассисаҳои бонкӣ пешниҳодҳои худро оид ба масъалаҳои муҳокимашаванда пешкаш карданд.