Се ҳолати интиқоли ғайриқонунии маводи нашъадор

Душанбе, 10.04.2014 (АМИТ «Ховар», Фарзонаи Давлат).- Аз ҷониби кормандони Раёсати мубориза бар зидди қочоқи маводи мухаддири Хадамоти гумруки назди Ҳукумати Ҷумҳурии Тоҷикистон ҳафтаи равон дар натиҷаи гузаронидани амалиёти махсуси фаврӣ-ҷустуҷўӣ се далели фурӯш, нигахдошт ва интиқоли ғайриқонунии маводи нашъадор ошкор гардид.
Тавре ки дар ин бора аз Хадамоти гумрук хабар доданд, сокини деҳаи Катдараи ноҳияи Ҳамадонӣ  Худойдод Қурбонови 30- сола  дастгир шуд, ки ҳангоми боздошт аз ӯ 8 бастаи маводи навъи ҳашиш дарёфт гардида, зимни тафтишоти кормандони фаврии раёсати мазкур аз хонаи истиқоматии ӯ 12 бастаи навъи ҳашиш ёфт ва мусодира  шуд.
Ҳамчунин кормандони дидбонгоҳи гумрукии «Панҷи поён» хангоми назорати гумрукии шаҳрвандон, шаҳрванди 28-солаи Ҷумҳурии Исломии Афғонистонро боздошт намуданд, ки маводи навъи чарсро дар пойафзолҳояш бо мақсади интиқол пинҳон кардааст.
Инчунин манбаъ иттилоъ медиҳад, ки дар ҳафтаи равон дар фурудгоҳи шаҳри Кӯлоби вилояти Хатлон Маҳмадалии Маҳмадуллои 25- сола, сокини шахри Кӯлоб  ҳангоми гузаштан аз қайд ва назорати гумрукӣ зери шубҳаи кормандони гумрук қарор гирифта, ҳангоми муоинаи шахсии шаҳрванд аз дохили либоси тагпӯши ӯ зиёда аз 600 грам маводи нашъадори навъи ҳашиш ёфт ва мусодира гардид.
Гуфта мешавад, ки феълан нисбат ба далелҳои номбурда тафтишот идома дошта, парвандаи ҷиноӣ бо дастрасии моддаҳои 200 ва 289-и КҶ ҶТ оғоз шудааст.