Вохӯрӣ дар доираи Ҳафтаи китоб

Душанбе, 08.04.2014 (АМИТ «Ховар», Ситораи Боймурод).- Ҳамасола дар кишвар аз 2-то 9-уми  апрели соли равон ҷиҳати баланд бардоштани рўҳияи китобдўстӣ, меҳру муҳаббати самимӣ доштан нисбат ба китоб ва гиромидошти калом «Ҳафтаи китоби бачагона» доир мегардад.
Дар робита ба ин вохўрии нависандаи шинохтаи тоҷик, барандаи Ҷоизаи ИЖТ ба номи А. Лоҳутӣ, корманди Маркази миллии Кумитаи ТВ ва радиои назди Ҳукумати ҶТ, сардабири маҷаллаи «Душанбе» Садриддини Ҳасанзода бо толибилмону омўзгорони мактаби таҳсилоти умумии №-1 ноҳияи Ҳисор ва муаррифии китоби нави ў «Муҷассамаи нодир» барпо гардид.
Дар маҳфил ходими илмии Пажӯҳишгоҳи забон ва адабиёти ба номи Рўдакӣ Раҳмон Остон, шоирон  Ҳидоятулло Раҳмонӣ, Султонмуроди Одина, директори Муассисаи давлатии «Фурўши китоб ва нашрияҳои даврии мақомоти иҷроияи маҳаллии  ҳокимияти давлатӣ дар шаҳри Душанбе», нависанда Аброр Зоҳир роҷеъ ба эҷодиёти нависандаи шинохта, маҳорати тасвиру образофарии ў, забони асарҳояш андешаронӣ карданд.
  Зикр шуд ки адиб ҳамчунин офарандаи понздаҳ филмҳои мустанади телевизионӣ ва 50 мақолаи илмӣ буда, дар айни ҳол чун унвонҷӯи Пажӯҳишгоҳи забон ва адабиёти ба номи Рўдакӣ ба пажӯҳишу таҳлили қиёсии асарҳои омиёнаи адабиёти классикӣ ва таъсири онҳо ба асарҳои устод Айнӣ машғул мебошад.
  Дар ин бора  аз Китобхонаи давлатии ҷумҳуриявии бачагонаи ба номи Мирсаид Миршакар хабар доданд.