“Суғд — 2014”-ярмаркаи савдо

Душанбе, 26.06.2014. (АМИТ «Ховар», Зарангези Латиф).- Дирӯз дар вилояти Суғд ярмаркаи минтақавии савдо таҳти унвони “Суғд — 2014” ифтитоҳ шуд. Ярмарка бо мақсади муаррифии маҳсулоти соҳаҳои саноату кишоварзии вилоят ва ба роҳ мондани ҳамкориҳои тарафайн бо соҳибкорону ширкатҳои давлатҳои хориҷӣ сурат мегирад. Дар ярмарка беш аз 60 корхонаи саноатии вилоят маҳсулоти хеш, аз қабили ҳунарҳои анъанавии дастӣ: сӯзанидӯзию гилембофӣ, кордсозию тоқидӯзӣ, сабадбофӣ, масолеҳи сохтмонӣ, либосҳо, нӯшокиҳои ташнашикан, таҷҳизоти электронӣ, дастовардҳои соҳаи алоқа ва бонкҳо, шириниҳо, маҳсулоти ширию гӯштӣ, дару тирезаҳои пластикӣ, намунаи сабзавоту полезиҳо ва меваҷотро пешниҳоди меҳмонон ва сокинони вилоят гардониданд.
Ба ярмаркаи мазкур намояндагони беш аз 30 давлати ҷаҳон, аз қабили Русия, Қазоқистон, Қирғизистон, Афғонистону Эрон, Покистон, Белгия, Олмону Латвия  даъват шудаанд.
Ба иттилои дафтари матбуоти раиси вилояти Суғд дар доираи ин ярмарка чорабиниҳои мухталиф, аз ҷумла форуми байналмилалӣ бо номи «Қудрати воридотӣ ва тиҷорати байналмилалӣ», вохӯрии ширкатҳои тиҷоратии ватанию хориҷӣ, қабули меморандум ва созишномаҳои тарафайни ҳамкорӣ ва ҷамъбасти озмуни “Маҳсулоти беҳтарини соли 2014” ба нақша гирифта шудаанд.