Коркарди нурии биологии «Биокомпост»

Душанбе, 11. 07.2014. (АМИТ “Ховар”, Раъно Нусратуллозода).- Тибқи иттилои Академияи илмҳои Ҷуҳурии Тоҷикистон дар нимсолаи аввали соли 2014 дар соҳаи илмҳои биологӣ таҳқиқоти комплексии гуногуншаклии биологии флора ва фауна, генофонд ва захираҳои биологии Тоҷикистон гузаронида шуданд. Таҳқиқот доир ба физиология, биохимия ва биотехнологияи растаниҳо ҳамчун асос барои селексияи навъҳои нави зироатҳои кишоварзӣ ва ба вуҷуд овардани системаи муосири тухмипарварӣ, коркарди агротехнологияи пешрафта густариш дода шуд. Олимони соҳаи ботаника натиҷаҳои таҳқиқоти хусусиятҳои биоморфологӣ ва биохимиявии намояндагони асосии растаниҳои хӯроки чорворо дар ҷамоаҳои марғзорӣ ва даштӣ бо назардошти таъсири омилҳои иқлимӣ ва антропогенӣ ҷамъбаст намуданд. Олимон ва мутахассисони соҳаи зоология ва паразитология ба мақсади ба роҳ мондани системаи мониторинг ва назорати шумораи ҳашароти зараррасони зироатҳои кишоварзӣ дар ду қитъаи таҷрибавӣ 2 адад домҳои рӯшноии назораткунандаро насб намуданд. Истифодаи чунин домҳои рушноӣ имконият медиҳад, ки назорат ва идоракунии ҳашароти зараррасон дар масоҳати 10 га замини зироатҳои кишоварзӣ ба роҳ монда шавад. Кормандони Маркази инноватсионии биологӣ ва тиббии Академияи илмҳо технологияи ҳосил намудани нурии биологии аз ҷиҳати экологӣ бехатари «Биокомпост»-ро коркард намуданд, ки он дар хоҷагиҳои ноҳияи Ваҳдат татбиқ карда шуд.