«Рисолати сулҳ — 2014» дар Чин

Душанбе, 26.08.2014. (АМИТ «Ховар», Мавҷуда Анварӣ).- Аз 9 то 30 августи соли ҷорӣ дар тамрингоҳи ҳарбии «Чжу-жихе»-и Ҷумҳурии Мардумии Чин машқҳои низомии зиддитеррористии «Рисолати сулҳ — 2014» ҷараён доранд. Дар ин чорабинӣ низомиёни 5 кишвари аъзои Созмони ҳамкории Шанхай — Тоҷикистон, Қазоқистон, Қирғизистон, Русия ва Чин ширкат доранд. Тибқи иттилои маркази матбуоти Вазорати мудофиа Тоҷикистонро дар ин машқҳо наздики 200 нафар хизматчии ҳарбӣ, аз ҷумла гурӯҳҳои фаврӣ ва ҷузъу томҳои таъйиноти махсуси вазорат таҳти роҳбарии муовини сардори ситоди генералӣ Тоҳир Хайруллоев муаррифӣ менамояд. Дар машқҳо аз неруҳои заминӣ, ҳавоӣ ва техникаю қисмҳои радиоэлектронӣ истифода мешавад. «Рисолати сулҳ — 2014» калонтарин машқи низомии неруҳои мусаллаҳи кишварҳои аъзои СҲШ аз замони таъсиси он ба шумор меравад. Таҳкими ҳамоҳангсозии амалҳои низомии кишварҳои аъзои СҲШ ҳангоми мубориза бо терроризм, тундгароӣ ва ҷудоихоҳӣ ҳадафи асосии машқи муштараки ҳарбӣ арзёбӣ шудааст. Манбаъ ҳамчунин илова намуд, ки дар ин рӯзҳо ҳамчунин дар шаҳри Пекини Ҷумҳурии Мардумии Чин Фестивал-озмуни кишварҳои аъзои ин созмон баргузор гардида истодааст, ки дар он оркестри ҳарбӣ-нафасии комендатии Вазорати мудофиаи Тоҷикистон иборат аз 70 нафар бо барномаи фарҳангӣ иштирок дорад.