Семинар оид ба таъмини оби нӯшокӣ

Душанбе, 14.08.2014. (АМИТ «Ховар», Марҳабои Азамат). — 13 август дар маҷлисгоҳи «Душанбе Плаза» — и пойтахт нахустсеминар дар мавзӯи «Нақшаҳои таъмини оби бехатар» баргузор гардид. Дар ин бора аз намояндагии Оксфам дар Ҷумҳурии Тоҷикистон ба АМИТ «Ховар» хабар доданд.Назар ба иттилои манбаъ, мақсад аз семинари мазкур бештар воқиф намудани аҳолӣ, дастгирӣ ва арзёбии аҳамияти Нақшаи таъмини бехатарии об байни вазорату идораҳои манфиатдори Тоҷикистон, ҳамчунин созмонҳои байналмилалию ғайриҳукуматӣ буд.Семинар ҳамчунин ба рушду дастгирии харитаи миллии роҳ ҷиҳати таъмини аҳолии Ҷумҳурии Тоҷикистон бо оби бехатар мусоидат намуд. Дар семинар нақшаи истифодаи оби бехатар дар ҷумҳурӣ тарҳрезӣ гардида, ҳамаи масоили зикршуда манзури Вазорати тандурустӣ ва ҳифзи иҷтимоии аҳолӣ, Оксфам, Созмони ҷаҳонии тандурустӣ ва Барномаи рушди СММ гардид. Семинар бо ибтикори Созмони байналмилалии Оксфам дар Ҷумҳурии Тоҷикистон ва Дафтари минтақавии Созмони ҷаҳонии тандурустӣ зимни ҳамкорӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва бо дастгирии молиявии Раёсати рушду ҳамкории Швейтсария роҳандозӣ шуд.