Вогузории панҷ ваколати асосӣ ба Хадамоти муҳоҷират

Душанбе, 15.08.2014. (НИАТ «Ховар», Лайло Тоири).- Семинар дар мавзўи «Шиносоии сардорони шуъба ва бахшҳои зерсохторҳои шаҳру ноҳияҳо бо ҳайати роҳбарикунандаи дастгоҳи марказии Хадамоти муҳоҷират» 14 август дар Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон оғоз гардида, кори он имрӯз, 15 август идома дорад. Дар он ташкили масъалаҳои кор дар шаҳру ноҳияҳо дар самти муҳоҷирати меҳнатӣ, вазъи муҳоҷирати дохилӣ ва экологӣ дар ноҳияҳои тобеи ҷумҳурӣ, тартиби ҳуҷҷатгузориҳо, қабули шаҳрвандон ва ба роҳ мондани фаъолияти Хадамоти муҳоҷират дар тамоми шаҳру ноҳияҳо баррасӣ гаштанд. Муовини якуми сардори Хадамоти муҳоҷират Муқим Ниёзов гуфт, ки ҷомеаи имрӯзаи Тоҷикистонро бе раванди муҳоҷирати меҳнатӣ ба хориҷи кишвар тасаввур кардан ғайриимкон аст, зеро ин раванд дар айни замон ба як зуҳуроти иҷтимоии бузурге мубаддал гаштааст, ки аз он кафолати ҳифзи иҷтимоӣ, иқтисодӣ, сиёсӣ ва амнияти кишвар вобастагии зич дорад. Шумораи муҳоҷирони меҳнатӣ дар ҷаҳон дар панҷ соли охир аз 65 то ба 235 миллион нафар афзудааст. Ҳамчунин дар асоси пешбиниҳои СММ то соли 2050 шумораи муҳоҷирони меҳнатӣ дар ҷаҳон ба 405 миллион нафар хоҳад расид. Бояд зикр намуд, ки тибқи Низомномаи нави Хадамоти муҳоҷирати Вазорати меҳнат, муҳоҷират ва шуғли аҳолии ҶТ панҷ ваколати асосӣ ба Хадамоти муҳоҷират вогузор гардидааст. Ин ба танзим даровардани раванди муҳоҷирати меҳнатӣ, бо кор таъмин намудани шаҳрвандон дар хориҷа, ба касбомӯзӣ фаро гирифтани муҳоҷирони меҳнатӣ, робита бо ҳамватанони бурунмарзӣ, назорати будубоши шаҳрвандони хориҷӣ ва бурдани корҳои иттилоотию фаҳмондадиҳӣ дар байни шаҳрвандони ҷумҳурӣ оид ба мушкилоти муҳоҷирони меҳнатӣ мебошад. Дар семинар инчунин ваколатҳои асосии Хадамоти муҳоҷират, мушкилоти асосии муҳоҷирон, қонунгузориҳои нави Федератсияи Русия дар самти муҳоҷирати меҳнатӣ ва дигар паҳлўҳои он мавриди баррасӣ қарор гирифтанд.Дар ин бора ба АМИТ «Ховар» сухангӯи Хадамоти муҳоҷират Абдуллои Қодирӣ иттилоъ дод.