Ҷаласаи Шӯрои байниҳукуматии лоиҳаи САSA — 1000

Истамбул, 27.04.2015. (АМИТ «Ховар», Катерина  Аксакова).- 24  апрел  дар  шаҳри   Истамбули  Туркия  ҷаласаи  Шӯрои  байниҳукуматии   лоиҳаи САSA — 1000 баргузор  гардид. 
Тавре  ки  аз  Консулгарии  генералии  Тоҷикистон дар  Истамбул   ба  АМИТ «Ховар» хабар  доданд, дар  ҷаласа  ҳайати Тоҷикистон  иборат  аз  вазири энергетика   ва  захираҳои оби Ҷумҳурии  Тоҷикистон Усмонзода Усмоналӣ,  вазири   молияи  Ҷумҳурии  Тоҷикистон  Абдусалом  Қурбониён,  раиси  ШСХК «Барқи  тоҷик» Раҳматзода  Рустам  ва  шахсони  дигари  расмӣ  иштирок дошт. 
Дар  ҷараёни  ҷаласа  бархе  созишномаҳои асосии лоиҳаи САSA — 1000,  аз ҷумла Созишномаи  асосӣ  ва Созишномаи  хариди  нерӯи  барқ,  ҳамчунин  созишномаи  бебозгашт  иборат  аз 45  миллион  доллари байни  Ҳукумати  Тоҷикистон  ва  Иттиҳодияи байналмилалии  рушд  имзо  шуданд. 
Системаи  нави хатҳои интиқоли  барқ, ки  чор  кишварро  пайваст  намуда,  бо САSA — 1000 номгузорӣ  шудааст,  имкон  медиҳад, ки   захираҳои  аз  нигоҳи  экологӣ  поки гидроэнергетикӣ  дар  кишварҳои Осиёи  Марказӣ — Ҷумҳурии  Тоҷикистон  ва  Ҷумҳурии  Қирғизистон  ба таври  судманд  истифода шаванд.