Ҷомеаи солим аз оилаи солим аст

Душанбе, 28.04.2015. (АМИТ  «Ховар», Лайло Тоирӣ).-Тибқи нақшаи Кумитаи кор бо занон ва оилаи назди Ҳукумати Ҷумҳурии Тоҷикистон бахшида ба Соли оила 21 — 22 апрели соли 2015 дар маҳаллаҳои Хуҷамбиёи боло ва поён, Варзоб ГЭС-и ноҳияи Исмоили Сомонӣ вохӯрӣ доир гардид.
Дар вохӯрӣ намояндагони Кумитаи кор бо занон ва оилаи назди Ҳукумати Ҷумҳурии Тоҷикистон, Раёсати кор бо ҷавонон, варзиш ва сайёҳии шаҳри Душанбе, мудири шуъбаи кор бо занон ва оилаи ноҳия байни 200 нафар занону духтарон сухан гуфта, аз онҳо даъват ба амал оварданд, ки ба ҳар гуна ҳизбу ҳаракатҳои ифротгароӣ шомил нашуда, кӯшишу ғайрати худро ба хондану аз худ намудани донишҳои замонавӣ равона намоянд, то дар оянда мавқеи намоёнро дар ҷомеа ишғол карда тавонанд.
Зимни  вохӯрӣ  нуктаи махсус зикр гардид, ки оила як рукни нозукест, ки камтарин нофаҳмӣ ва инҷиқиҳои рӯзгор метавонад суботи онро халалдор намояд. Барои роҳ надодан ба ҳар гуна нофаҳмиҳо мо бояд пеш аз ҳама соҳибмаълумот бошем, аз фарҳангу маданияти баланди тоҷиконаи худ огоҳ бошем, ватанпараст буда ва ҳуввияти баланди миллӣ дошта бошем, эҳтирому ҳурмати волидон ва калонсолонро ба ҷо орем, метавонем оилаи солим барпо намоем, зеро сарчашмаи ҷомеаи солим аз оилаи солим аст.