Афзоиши содироти маҳсулот аз ҷониби коргоҳҳои Хуҷанд

Хуҷанд, 11.04.2015. (АМИТ “Ховар”, Абдуаҳад Шарифзода).-Дар  шаҳри Хуҷанд дар се моҳи соли ҷорӣ аз ҷониби коргоҳҳои истеҳсолӣ ба маблағи 137 млн. сомонӣ маҳсулот истеҳсол шудааст. Инчунин дар ин раванд аз оғози соли равон дар миқёси шаҳр бо тавлиди 7 коргоҳи нави хурду миёна  200 ҷойи нави корӣ таъсис дода шуда, алъон дар шаҳр 154 коргоҳ амал мекунад. 
Мутобиқ ба маълумоти масъулини шуъбаи мухталиф, суръати афзоиши истеҳсоли маҳсулот дар ин давра нисбат ба ҳамин давраи соли гузашта ба 25,3% ё 27 млн. сомонӣ баробар буда, аз ҷониби коргоҳҳои истеҳсолӣ 50 намуд маҳсулоти саноатӣ, аз қабили хӯрокворӣ, саноати сабук ва мошинсозӣ бартарӣ дорад. 
Дар ин замина ҳамзамон маҷмӯи маҳсулоти содиротӣ низ афзуда, он дар давраи ҳисоботӣ ба 40 млн. сомонӣ расонида шуд, ки дар муқоиса нисбат ба ҳамин давраи соли қаблӣ нишондиҳандаи мазкур 15 % зиёд мебошад. 
Ба иттилои манбаъ, асосан маҳсулоти содиротӣ ба мамлакатҳои Иттиҳоди Давлатҳои Муштаракулманофеъ, чун Қирғизистон, Қазоқистон ва Русия интиқол дода шуда, байни он маҳсулотҳои  хӯрокворӣ, саноати сабук ва сохтмонӣ бартарӣ доранд.