Баррасии рушди қолинбофӣ

Душанбе,16.04.2015 (АМИТ «Ховар»).- 14 апрел  раиси  Палатаи савдо ва саноати Тоҷикистон  Шариф  Саид  бо   менеҷери  лоиҳаи «Навсозӣ ва баланд бардоштани  қобилияти  рақобатпазирии корхонаҳои бахши қолинбофӣ, бахиядӯзӣ ва  нассоҷии Тоҷикистон» — и Созмони Милали Муттаҳид оид ба рушди саноат Фаррух Олимҷонов, коршиноси байналмилалии созмони мазкур Анита Травиани ва муовини сардори Раёсати  саноати  сабуки Вазорати саноат ва технологияҳои  нави ҶТ  Мавлуда  Киромова мулоқот  анҷом  дод.  
Назар ба  иттилои ПСС ҶТ, ҷонибҳо масоили  рушди  корхонаҳои соҳибкории  хурду  миёнаи  Тоҷикистон, аз ҷумла  роҳҳои беҳдошти  маҳсули  меҳнат ва баланд бардоштани  қобилияти рақобатпазирии корхонаҳои бахши қолинбофӣ, бахиядӯзӣ ва  нассоҷиро  мухокима  намуданд.
Ба гуфтаи  Фаррух Олимҷонов,  мақсад аз  лоиҳаи мазкур  расонидани ёрӣ  ба корхонаҳои  соҳаи қолинбофӣ, бахиядӯзӣ ва  нассоҷии Тоҷикистон  ба  манзури  муайян  намудани иқтидори  сотиротӣ дар  бозорҳои дохилию ҷаҳонӣ, ҳамчунин навсозии  корхонаҳо бо  истифода аз технологияҳои муосир, такмили қудрати идоравӣ  ва дастгирии  корхонаҳои соҳаҳои  асосии саноат ва тиҷорати хурд аст.