Боздиди Р. Аҳмадзода аз хонаводаи ҷавонони саркашида аз хизмат

Хуҷанд, 9.04.2015. (АМИТ “Ховар”, Абдуаҳад Шарифзода).-Раиси шаҳри Хуҷанд Раҷаббой Аҳмадзода дирӯз ба хонаводаи се тан ҷавоне, ки  аз хизмат дар сафи артиш саркашӣ кардаанд, рафт. Тавре ки ба АМИТ “Ховар” роҳбари маркази иттилоотии мақомоти шаҳр Маҳмудчон Муҳаммадӣ хабар дод, мақсад аз рафтани шаҳрдор ба хонаводаи ин ҷавонон- ин пеш аз ҳама огоҳӣ ёфтан аз вазъи аслии воқеа ва суҳбати ошкоро бо волидайни онҳо буд. Гарчанде ки то даъвати баҳории  кунунӣ  ба се тан даъватшаванда аз ҷониби кормандони комиссариати ҳарбии  шаҳрӣ  даъватнома барои ҳозир шудан ба коммисариати ҳарбӣ фиристода шуд, вале онҳо аз ҳозир шудан саркашӣ  карданд.
Зимни мулоқот раиси шаҳр доир ба  масъулияти падару модар баҳри тарбияи сазовори фарзандон ва ҷавобгарии фарзандони онҳо дар назди қонун  ёдрас шуда, баён доштааст, ки дар сурати идомаи ин раванд ва ҳозир нашудани фарзандони онҳо барои рафтан ба сафи Қувваҳои мусаллаҳи Тоҷикистон алайҳи онҳо тадбир хоҳанд андешид.