ДМИТ ободу зебо мешавад
Душанбе, 13.04.2015. (АМИТ «Ховар», Раъно Нусратуллозода).- Бо ташаббуси раёсати маъмурию хоҷагӣ ва шуъбаи тарбияи Донишкадаи молия ва иқтисоди Тоҷикистон 11 апрел дар донишкада шанбегӣ гузаронида шуд, ки дар он донишҷўён ва кормандони хоҷагӣ дастаҷамъона иштирок карда, гул шинонида, майдончаҳоро побелу бехҳои дарахтонро нарм намуданд.
Саймаҳмуд Қаландаров, муовини ректор оид ба масъалаҳои иқтисодӣ ва маъмурию хоҷагӣ зикр намуд, ки аз аввали мавсими ниҳолшинонӣ мо дар саҳни донишкада дарахтони сояафкан ва гулу сабзаҳо шинонидем, ки барои боз ҳам зеботар гардидани симои донишкада муфид аст. Зикр гардид, ки то охирҳои соли 2015 иншоотҳои навсохт ба истифода дода шуда, биноҳои куҳна бардошта мешаванд ва саҳни донишкада пурра мумфарш мешавад.
Бояд зикр намуд, ки корҳои сохтмонӣ ва ободонӣ марҳила ба марҳила дар донишкада идома ёфта, дар натиҷаи он донишкада ба як боғи зебову тамошобоб табдил меёбад.