Фармоишгар ва пудратчии Театри миллӣ аз андоз озод мегардад

 
 Душанбе, 8.04.2015.(АМИТ «Ховар», Марзия Саидзода).- Фармоишгар ва пудратчии  асосии сохтмони Театри миллии Тоҷикистон аз андоз аз арзиши иловашуда, андоз аз  истифодабарандагони роҳҳои мошингард ва андоз аз фоида озод мешаванд. Дар иртибот ба ин 8 апрел вакилони тозаинтихоби палатаи поёнии Парлумони Тоҷикистон ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2015» тағйиру илова ворид намуданд.
         Ҷамолиддин Нуралиев-муовини аввали вазири молияи кишвар масъалаи мазкурро дар назди вакилони Парлумон тавзеҳ дода гуфт, ки бо Қарори Ҳукумати мамлакат фармоишгари ин иншоот Дирексияи сохтмони асосии Дастгоҳи иҷроияи Президенти кишвар ва пудратчии он ҶДММ «Сирдарё» тасдиқ шудааст. Театри миллӣ, ки санги асоси онро Президенти кишвар дар рӯзҳои таҷлили ҷашни Наврӯз гузошта буд, дар зарфи панҷ сол бо маблағи 680 миллион сомонӣ бунёд мешавад. Бо қарори Ҳукумати мамлакат сохтмони  Театри миллӣ иншооти махсусан муҳим этироф гардида, аз ин рӯ ҳангоми воридоти мол ва  масолеҳи сохтмонию техника  аз пардохти андоз аз арзиши илвашуда ва боҷи гумрукӣ озод мешавад. Ҳадафи сохмони мазкур табдил додани Театри миллӣ ба маркази  ягонаи бузурги фарҳангии кишвар арзёбӣ мегардад.
       Дар давраи сохтмон дар иншоот 1000 ҷойи кор муҳайё гардида,   50% -и коргаронро шаҳрвандони Тоҷикистон ва  ҳангоми корҳои васлкунӣ 70 %-и коргаронро шаҳрвандони Чин ва 30% -ро шаҳрвандони Тоҷикистон ташкил медиҳанд.  Дар мавриди пурра ба истифода додани ин иншоот беш аз 300 нафар шаҳрванди кишвар бо ҷойи кори доимӣ таъмин мешаванд.