Х.Ибодзода дар Анҷумани умумиҷаҳонӣ суханронӣ кард

Душанбе,14.04.2015.(АМИТ “Ховар”, Назир Назиров).- Раиси Кумитаи ҳифзи муҳити зисти назди Ҳукумати ҶТ Хайрулло Ибодзода 13 апрел дар шаҳри Кенҷуи Куриё дар Анҷумани умумиҷаҳонии об иштирок намуд. Мавсуф зимни суханрониаш ба созмондиҳандагони анҷуман изҳори миннатдорӣ карда, гуфт, ки анҷуман яке аз воқеаҳои муҳими раванди ташаккули диди нав барои ҳалли масоили об мегардад. “Имсол муддати эътибори Даҳсолаи байналмилалии амалиёти “Об барои ҳаёт“, солҳои 2005-2015 анҷом меёбад. Дар ҳошияи Конфронси байналмилалии сатҳи баланд, ки аз 9 то 11 июни соли 2015 дар шаҳри Душанбе баргузор мешавад, масоили саъю кӯшишҳои минбаъда барои ноил шудан ба афзоиши устувори захираҳои об муҳокима мешаванд. Бисёр масъалаҳои асосии анҷуман ба рӯзномаи конфронс шомил мешаванд ва камина умедворам, ки шаҳри Душанбе идомаи мубоҳисаҳои анҷумани 7-уми умумиҷаҳонии об хоҳад гардид”, зикр намуд Хайрулло Ибодзода.