«Майдони қаҳрамонон» дар Конибодом

Хуҷанд, 18.04.2015. (АМИТ “Ховар”, Абдуаҳад Шарифзода).-Бахшида ба 70-солагии Иди Ғалаба ва ҳамзамон чун нишони эҳтирому сипосмандӣ ба иштирокчиёни ҶБВ, инчунин рамзи арҷгузорӣ нисбат ба собиқадорони меҳнати ақибгоҳ дар яке аз кӯчаҳои марказии шаҳри Конибодом хиёбони фарҳангиву фароғатии «Майдони қаҳрамонон» бунёд гардида истодааст. Тавре ки ба АМИТ “Ховар”  аз мақомоти маҳаллии шаҳри Конибодом иттилоъ доданд,   дар мавзеи мазкур аз ҷониби сохтмончиёни корхонаи «Қандсохтмон» корҳои сохтмонӣ босуръат идома доранд. 
Ҳамзамон  баҳри бунёди «Майдони қаҳрамонон» дар Бонки давлатии амонатгузории “Амонатбонк” суратҳисоби махсуси «Садоқати Конибодом» кушода шудааст, ки аз ҷониби корхонаву ташкилоти гуногуни шаҳр, соҳибкорону шахсони саховатпеша маблағҳои муайян ворид мегарданд.
Мавзеи «Майдони қаҳрамонон» дар арафаи таҷлили рӯзи Ғалаба ба истифода дода шуда,  майдони мазкур бо гулу дарахтони ҳамешасабз, нишастгоҳҳои истироҳатӣ ва фаввораҳо оро дода шуда, инчунин  дар ин ҷо нимпайкараи 26  нафар собиқадорони меҳнати сотсиалистӣ ва 2 нафар Қаҳрамони Иттиҳоди Шӯравӣ аз Конибодом ҷой дода мешавад.