Маркази хизматрасонии бонкӣ дар Хистеварз

Душанбе, 14.04.2015.(АМИТ «Ховар», Лайло Тоирӣ).-Дар маркази деҳоти Хистеварзи ноҳияи Бобоҷон Ғафуров ба наздикӣ бинои нави маркази хизматрасонии Бонки давлатии амонатгузории Ҷумҳурии Тоҷикистон “Амонантбонк” ба истифода дода шуд. Бинои нави маркази хизматрасонии бонкӣ дар Хистеварз бо харҷи беш аз 270 ҳазор сомонӣ бунёд шудааст. Танҳо дар соли сипарӣ бинои филиалҳои БДА ҶТ “Амонатбонк” дар шаҳру ноҳияҳои Қайроққум, Исфара, Конибодом ва Спитамен баъди анҷоми тармими асосӣ, таҷдидан ба истифода супурда шуданд. Ҳамаи ин биноҳо солиёни зиёд таъмир нашуда, дар вазъи ногувор қарор доштанд ва баъди таъмиру навсозӣ дар ин ҷо тамоми шароити хуби корӣ фароҳам оварда шуд. Илова бар ин таҷҳизоти дигари техникии ин филиалҳо низ нав шуданд ва бо ин мақсад зиёда аз 1 миллиону 200 ҳазор сомонӣ сарф гардид,” — таъкид дошт сарвари филиали №23 БДА ҶТ “Амонатбонк” дар вилояти Суғд Ҳокимшоҳ Бобозода. Бино ба гуфтаи ӯ корҳои таъмиру навсозӣ имсол низ идома хоҳанд ёфт ва бинои филиалҳо дар шаҳру ноҳияҳои Хуҷанд, Бобоҷон Ғафуров, Ҷаббор Расулов, Ғончӣ, Истаравшан ва Айнӣ бо тарзу усули замонавӣ навсозӣ гардида, бо мебел, мизу курсиҳои нав таъмин мешаванд. Мутобиқи ҳисобҳои пешакӣ имсол маблағгузорӣ ба ин гуна корҳо нисбат ба соли гузашта ду баробар зиёд шуда, 2,4 миллион сомониро ташкил медиҳад. Бино ба иттилои хадамоти матбуоти бонк, дар ин ҷо се маркази хизматрасонии “Амонатбонк” фаъол буда, ба мизоҷон, аз ҷумла ба зиёда аз 4700 нафар нафақахӯр хидмат мерасонад.