Муҳокимаи лоиҳаи сохтмони шохаи роҳи оҳан

Душанбе, 22.04.2015. (АМИТ “Ховар”, ).- Чанде пеш роҳбарияти маъмурияти Минтақаи озоди иқтисодии “Суғд” бо намояндагони ширкати байналмилалии лоиҳакашии China Railway 20 Bureau Group Corporation мулоқот анҷом дод.
Тавре ки намояндаи Минтақаи озоди иқтисодии “Суғд” хабар медиҳад, ширкати мазкур дар шаҳри Сиани музофоти Шенсии Чин воқеъ буда, ба таррҳезӣ ва сохтмони роҳҳои оҳану мошингард, сохторҳои маҳаллӣ, кӯпрук ва ғайра машғул аст.
Мақсад аз сафари меҳмонон шиносоӣ бо фаъолияти Минтақаи озоди иқтисодии “Суғд” ва лоиҳаҳои сармоягузории бахши эъмори шохаҳои роҳи оҳан буд.
Ёдовар мешавем ки маъмурияти Минтақаи озоди иқтисодии “Суғд” лоиҳаи сохтмони шохаи роҳи оҳан аз истгоҳи Спитамен то МОИ “Суғд”- ро, ки масофааш 22 километрро ташкил медиҳад,  дар ихтиёр дорад. Лоиҳаи мазкур қисми таркибии лоиҳаи минтақавии сохтмони роҳи оҳани масофааш беш аз 140 километр то кони калонтарини нуқраи Кони Калони Мансур ба шумор меравад.
Ёдовар мешавем ки 20 апрел раиси вилояти Суғд А. Қодирӣ ҳайати Чинро барои муҳокимаи масъалаи татбиқи лоиҳаи сохтмони роҳи оҳан ба ҳузур пазируфт.