Мувофиқшавии иқтисодиёти ҶТ баъди узвият дар СҶТ

Душанбе,16.04.2015 (АМИТ «Ховар»  Кристина Эрлих).- 15 апрел тахти раёсати муовини аввали  вазири рушди  иқтисод ва  савдо Саидраҳмон Назриев ҷаласаи васеи гурӯҳи корӣ  аз рӯи масоили  танзими фаъолияти  созмонҳои  байналмилалӣ ва  мақомоти давлатии ҳокимият аз рӯи ӯхдадориҳои Ҷумҳурии Тоҷикистон дар Созмони  ҷаҳонии  тиҷорат баргузор  гардид.
Назар ба хабари Вазорати рушди иқтисод  ва  савдои ҶТ, дар  ҷараёни ҷаласа зикр шуд, ки бо  Қарори  Ҳукумати Ҷумҳурии Тоҷикистон аз 31 октябри соли 2014 «Барномаи мувофиқшавии иқтисодиёти Ҷумҳурии Тоҷикистон бинобар узвият дар Созмони ҷаҳонии тиҷорат» қабул шуда буд. Мақсади асосии қарори мазкур иборат аз фароҳам овардани шароити мусоид барои рушди соҳибкории хурду  миёна, ҷалби сармояҳои хориҷӣ, тақвияти  ҳамкории  дуҷонибаю  бисёрҷониба бо кишварҳои  узви СҶТ, таъмини афзалиятҳои узвият дар  СҶТ барои  доираи васеи  сохибкорону тоҷирон аст.
Ин чорабинӣ  дар  заминаи Созишномаи дуҷонибаи байни Вазорати  рушди иқтисод ва савдои Ҷумҳурии Тоҷикистон ва Барномаи рушди СММ  дар  ҳошияи лоиҳаи минтақавии «Аврупои доманадор:  Мусоидат  ба тиҷорат  барои кишварҳои Осиёи Марказӣ» роҳандозӣ шуд.
Барномаи  рушди СММ дар  ҳошияи  ин  ибтикорот  ба  баланд бардоштани қобилияти кории  мутахассисони   Вазорати  рушди  иқтисод ва  савдои Ҷумҳурии  Тоҷикисон  мусоидат карда, саъйу кушишҳоро  барои  ҳамгироию ҳамкории мушорикон дар амри иҷрои  ӯҳдадориҳои Ҷумҳурии  Тоҷикистон  дар Созмони  ҷаҳонии  тиҷорат  дасгирӣ  менамояд.