Нақши ДДК дар тайёр намудани мутахассисон назаррас аст

Кӯлоб,22.04.2015. (АМИТ «Ховар», Сулаймони Хол).-  Дар ҳафтаи илм  дар Донишгоҳи давлатии Кӯлоб (ДДК) Конфронси ҷумҳуриявӣ таҳти унвони «Нақши Донишгоҳи давлатии Кӯлоб ба номи А. Рӯдакӣ  дар тайёр намудани мутахассисон» гузаронида шуд, ки дар он аз тамоми муасисаҳои олии кишвар, марказҳои илмию институтҳои тадқиқотии Академияи илмҳои кишвар олимону мутахассисон ширкат варзида, маърӯза намуданд.  
Меҳмонон бо намоиши дастовардҳои илмӣ — тадқиқотӣ ва ихтрооту навоварии олимону муҳаққиқони донишгоҳ , ки  дар  тӯли 70 сол таҳия ва таълиф гардидаанд,   шинос шуданд.
Зимни ҷаласаи пленарӣ  муовини вазири маориф ва илми кишвар оид ба зинаҳои тайнамудаи олимону омӯзгорони донишгоҳ дар тӯли 70 соли мавҷудият сухан гуфт. Мавсуф зикр намуд, ки дар арафаи таҷлили ҷашни 70-солагии ДДК  бинои 7 ошёнаи маъмурию таълимӣ қомат афрохта, ҷиҳати таъминоти техникӣ, баланд бардоштани шароити иқтисодии кормандон ва беҳтар ба роҳ мондани ҷараёни таълиму тарбия шароити мусоид фароҳам оварда мешавад.