«Равшан»- бозиро бар «Хайр» бохт

Душанбе, 15.04.2015. (АМИТ “Ховар”, Рафоати Абдулҳамид).- Тавре ки  Маркази матбуоти Кумитаи миллии олимпии Тоҷикистон хабар додааст даври дуюми сабқати лигаи олии футболи Тоҷикистон бо бозии дастаҳои «Равшан»-и Кӯлоб ва «Хайр»-и Ваҳдат шурӯъ шуд.
Ин бозӣ, ки шоми 14- уми  апрел дар Варзишгоҳи марказии шаҳри Кӯлоб бо ҳузури беш аз 15 ҳазор тамошобин баргузор гардид, бо пирӯзии меҳмонон ва бо ҳисоби 2-1 ба анҷом расид. Ҳарсе гол дар нимаи аввали бозӣ зада шуд.
Голҳои «Хайр»-ро Мӯҳсинҷон Парпиев дар дақиқаи 10-ум ва Меҳроҷиддин Музаффаров дар дақиқаи 42-юм заданд. Голи «Равшан»-ро Шодибек Ғаффоров дар дақиқаи 35-ум ба ҳадаф расонд.
Ду бозии дигари даври дуюм рӯзи шанбеи 18- уми  апрел байни дастаҳои «Парвоз»-и Бобоҷон Ғафуров — «Хуҷанд»-и Хуҷанд ва ССКА «Помир»-и Душанбе — «Вахш»-и Қӯрғонтеппа барпо мегардад. Ду бозии охирини даври дуюм рӯзи якшанбеи 19- уми  апрел миёни дастаҳои «Далерон-Ӯротеппа»-и Истаравшан — «Регар-ТадАЗ»-и Турсунзода ва «Барқи тоҷик»-и Душанбе — «Истиқлол»-и Душанбе сурат мегирад.
Бояд гуфт, бо сабаби зиёд шудани теъдоди дастаҳои ширкаткунандаи сабқати лигаи олӣ, Лигаи миллии Тоҷикистон тасмим гирифт, мусобиқаи 24-уми қаҳрамонии кишвар бо ширкати даҳ даста дар ду давра гузаронда шавад. Дар арафаи мусобиқаи имсолаи қаҳрамонии кишвар масъалаи маблағгузории бошгоҳи футболи «Энергетик»-и Душанбе ҳал шуд. Ин даста, ки ширкаткунандаи даҳуми чемпионати Тоҷикистон-2015 мебошад, имсол «Барқи тоҷик» ном гирифтааст.
Лигаи миллии футболи Тоҷикистон тақвими бозиҳои чемпионатро, ки аз се давра иборат буд, тағйир дод ва дастаҳо акнун дар ду давра бозӣ мекунанд. Ҳар як даста имсол 18 бозӣ анҷом медиҳад.
Дар ҳамин ҳол дар ҷадвали мусобиқа «Хайр” бо 6 имтиёз аз ду бозӣ дар ҷои аввал аст. Дастаҳои «Истиқлол” ва «Вахш”, ки ҳар кадом як бозӣ анҷом додааст, бо се имтиёзӣ мутаносибан дар ҷойҳои дуюму сеюм қарор доранд.