САҲА суботи сиёсии Осиёи Марказиро дастгирӣ мекунад

Душанбе, 03.04.2015. (АМИТ «Ховар»,  Бекназари Абубакр).- «САҲА   ҳамчун  созмон кӯшиш  менамояд, ки  суботи  сиёсии Осиёи  Марказиро  дастгирӣ  намояд. Камина  имсол  ба  ҳамаи  кишварҳои  Осиёи  Марказӣ  сафар  карданиам», — гуфт  раиси  амалкунандаи  Созмони  амнияту  ҳамкорӣ,  муовини  аввали  сарвазир, вазири  корҳои  хориҷии  Сербия  Ивитса  Дачич  баъди  мулоқот бо Президенти  Тоҷикистон  Эмомалӣ  Раҳмон. 
Ивитса  Дачич  иброз дошт, ки  мақсади  асосии САҲА  расонидани  ёрӣ ба коҳиш  додани  вазъи  минтақа  ва  ҳалли  масоили  кушодаи  байни  кишварҳои минтақа  аст. Ба  гуфтаи  ӯ,  бояд  масъалаҳои  муҳими  марбут ба  идораи  захираҳои об,  энергетика,  ҳифзи  сарҳадҳои наздик бо  Афғонистон ҳал  карда шаванд. 
«САҲА  бояд  шарики   кишварҳои  Осиёи  Марказӣ  дар таҳкими  амнияту  субот, густариши муносибатҳои  ҳамаҷониба  буда,  набояд  ба  корҳои дохилии  ин  кишварҳо дахолат  кунад,  — афзуд  И.Дачич.
Раиси САҲА  дар  мавриди  муносибатҳои дуҷонибаи байни  Сербия  ва  Тоҷикистон  иброз дошт, ки  онҳо  ду давлати  дӯст  буда,  бояд  сатҳи  муколамаи  сиёсиро  густариш диҳанд, табодули ташрифот дар  сатҳи баландро  рӯи  кор оранд,  муносибатҳои  иқтисодиро, ки  имрӯз бо дарназардошти  муомилоти  мол  дар сатҳи  пасттарин  қарор  доранд,  ривоҷ  диҳанд. «Имрӯз барои  рушди   ҳамкории  дуҷонибаи муштарак имконоти  кофӣ вуҷуд  дошта,  мо дар  ин  арса  ҳамаи чораҳои  имконпазирро  мебинем»,  гуфт  дар  хотима  И.Дачич.