Суғд: нигаронӣ аз афзоиши ҳодисаҳои роҳу нақлиётӣ

Хуҷанд, 14.04.2015. (АМИТ “Ховар”, Абдуаҳад Шарифзода).-Сар аз соли равон дар шимоли кишвар назар ба ҳамин давраи соли гузашта содиршавии  ҳодисаҳои роҳу нақлиётӣ рӯ ба афзоиш аст. Тавре ки  ба АМИТ “Ховар” корманди БДА Раёсати ВКД  ҶТ дар вилояти Суғд Д.Ализода иттилоъ дод, дар давоми 3 моҳи соли 2015 дар роҳҳои нақлиётгарди ҳудуди вилоят 85 ҳодисаи роҳу нақлиётӣ ба қайд гирифта шуда, бар асари он 32 нафар ба ҳалокат расида, 94 тани дигар ҷароҳати гуногуни ҷисмонӣ бардошт. Дар натиҷаи муқоиса ба ҳамин давраи соли сипаришуда теъдоди садамаҳо 24 ҳодиса зиёд гашта,  шумораи халокшудагон 7 нафар ва ҷароҳатбардоштагон 27 нафар афзудааст.
Инчунин ҳодисаҳои роҳу нақлиётӣ бо иштироки кӯдакону наврасон низ тайи 3 моҳи соли равон 16 адад (2014 — 16) рух дода, бар асари он шумораи фавти кӯдаку наврас 2 адад кам ба қайд гирифта шуда (2014 — 6), вале теъдоди ҷароҳатбардоштагон 3 адад афзудааст, ки ин нишондод соли 2014 ба 11 адад баробар буд, — афзуд манбаъ.