Тақдими техникаи кишоварзӣ ба навоҳии Хатлон

Душанбе, 7.04.2015. (АМИТ «Ховар», Раъно Нусратуллозода).- Дар доираи татбиқи лоиҳаи «Рушди чорводорӣ ва чарогоҳҳо» ва лоиҳаи «Беҳсозии сатҳи зиндагӣ дар Хатлон» имрӯз аз ҷониби Муассисаи давлатии Маркази идораи лоиҳаи «Рушди чорводорӣ ва чарогоҳҳо» дар ҳамоҳангсозӣ бо Вазорати кишоварзии Ҷумҳурии Тоҷикистон дар асоси зерлоиҳаҳои аз ҷониби ҷамъиятҳои чарогоҳистифодабарандагон ва мақомоти худфаъолияти ҷамъиятӣ пешниҳодгардида ба ноҳияи Муъминобод 12 адад трактори тамғаи МТЗ, як адад нақлиёти борбардор, 10 адад испор, 8 адад ядак ва 74 адад сихмола, барои ноҳияи Шӯрообод 8 адад трактори тамғаи МТЗ, 4 адад ядак, 8 адад испор, 2 адад ғаллакӯбак ва 28 адад сихмола дастрас гардида, барои истифода супорида шуд. Инчунин  ба ноҳияи Темурмалик 14 адад трактори тамғаи МТЗ, 13 адад ядак, 14 адад испор, 5 адад ғаллакӯбак ва 34 адад сихмола супорида мешавад.
Дар доираи татбиқи лоиҳаҳо боз дар назар дошта шудааст, ки дар ноҳияҳои зерҳадафи лоиҳа корҳои зарурӣ амалӣ шаванд, ки барои беҳтар намудани сатҳи зиндагии аҳолии деҳот мусоидат менамоянд. 
Мавриди зикр аст, ки ҳадафҳои асосии лоиҳаҳо —  мусоидат барои паст кардани сатҳи камбизоатии аҳолӣ, инчунин тараққиёти устувори захираҳои замин, рушди инфрасохтори истеҳсолии деҳот, баланд бардоштани самаранокии соҳаи кишоварзӣ буда, ба ҳадафҳои асосии давлату ҳукумати мамлакат оид ба беҳсозии сатҳи зиндагии аҳолии деҳот мувофиқат менамоянд.