Таҷлили Рӯзи байналмилалии оила дар Суғд

Хуҷанд, 27.04.2015. (АМИТ “Ховар”,Абдуаҳад Шарифзода).-Дар шимоли кишвар мутобиқ ба қарори раиси вилояти Суғд Абдураҳмон Қодирӣ 15 майи соли равон дар миқёси вилоят Рӯзи байналмилалии Оила таҷлил мешавад.
Тавре ки сомонаи расмии роҳбари вилоят иттилоъ медиҳад, қарори мазкур 22 апрели соли ҷорӣ ба тасвиб расида,  мақсад аз ҷашнгирии ин рӯз -пеш аз ҳама тарғибу ташвиқи оилаи солим ва маърифату одоби оиладорӣ ва пойдории оилаҳои ҷавон буда, дар доираи таҷлили Рӯзи оила дар қаламрави вилоят баргузории силсилаи чорабиниҳо, чун машваратҳои минтақавӣ таҳти унвони «Солимии ҷомеа аз пойдориву устувории оила» ва вохӯриҳо дар мавзӯи «Оила — мазраест поку муқаддас» бо оилаҳои намунавӣ дар ҷамоатҳои шаҳрак ва деҳот дар назар аст.