«Таронаи Душанбе» дар ДМТ

    Душанбе, 16.04.2015 (АМИТ «Ховар», Моҳинави Наврӯз).-Ҳамасола дар шанбеи сеюми моҳи апрел дар шаҳри Душанбе Рӯзи пойтахт бо шукӯҳу шаҳомати хосса ҷашн гирифта мешавад. Имрӯз бо ташаббуси Раёсати кор бо занон ва оилаи Мақомоти иҷроияи маҳаллии ҳокимияти давлатӣ дар шаҳри Душанбе бахшида ба ин санаи таърихӣ миёни донишҷӯдухтарони эҷодкор дар Донишгоҳи миллии Тоҷикистон  маҳфил-озмуни маърифатӣ-фарҳангии «Таронаи Душанбе» баргузор гашт. 
          Дар чорабинии мазкур устодону донишҷӯёни ДМТ, Донишгоҳи давлатии тиббии Тоҷикистон ба номи Абуалӣ Ибни Сино, Донишгоҳи давлатии омӯзгории Тоҷикистон ба номи Садриддин Айнӣ, Донишгоҳи технологии Тоҷикистон, Донишгоҳи аграрии Тоҷикистон ба номи Шириншоҳ Шоҳтемур, кормандони Раёсати кор бо занон ва оилаи Мақомоти иҷроияи маҳаллии ҳокимияти давлатӣ дар шаҳри Душанбе ва сохторҳои ноҳиявӣ, Муассисаи давлатии «Маркази худшиносии бонувон дар шаҳри Душанбе» ширкат варзиданд. 
      Ҳадафи маҳфил-озмуни маърифатӣ-фарҳангии «Таронаи Душанбе» пешниҳоди беҳтарин суруди идона дар васфи Душанбе буда, асосан маҳорати донишҷӯдухтарон дар эҷоди ин гуна шеърҳо санҷида шуд.     Дар ҷамъбасти маҳфил ба ҳамаи донишҷӯдухтарони навқалам  армуғонҳо ва китобҳои бадеӣ  туҳфа гардиданд.