Таъсиси корхонаи хурд дар Ховалинг

Ховалинг, 04.04.2015. (АМИТ «Ховар»,  Сулаймони  Хол).- Дар ноҳияи Ховалинг бо дастгирии мақомоти иҷроияи ҳокимияти давлатӣ ва соҳибкор Сулаймон Ширинов  дар маркази ноҳия сехи хурди дуредгарӣ муҷаҳҳаз бо таҷҳизоти муосири соҳавӣ мавриди истифода карор гирифт. Дар айни замон дар ин коргоҳ намудҳои гуногуни асбоби рӯзгор ва дару тиреза сохта шуда, пешниҳоди харидорон гардонида мешавад.
  Дар коргоҳ панҷ нафар бо ҷои кор таъмин гардида, ҳамарӯза бо дархости мизоҷон масолеҳи сохтмонии рӯзгорро омода месозанд. Бо афзоиши талабот ба тирезаҳои пластикӣ сохтани ин намуди тирезаҳо бо андозаҳои гуногун ба роҳ монда шудааст. Соҳибкор мақсад дорад коргоҳро васеъ намуда, шумораи коргаронро се баробар афзоиш диҳад.