Убайдуллоев — ғолиби Ҷоми Пойтахт оид ба теннис

Душанбе, 27.04.2015. (АМИТ “Ховар”, Ситораи Боймурод).- Ба иттилои Кумитаи миллии олимпии кишвар мусобиқаи кушода байни дӯстдорони теннис барои Ҷоми пойтахти Тоҷикистон бахшида ба ҷашни 70-солагии Ғалаба дар Ҷанги Бузурги Ватании солҳои 1941-1945 рӯзҳои 25-26 апрел дар Қасри тенниси шаҳри Душанбе доир шуд.
Гуфта мешавад, ки Ҷамолиддин Убайдуллоев, сардори Раёсати созмонҳои байналмилалии  Вазорати корҳои хориҷии Тоҷикистон дар қувваозмоии ниҳоӣ бар ғолиби порсолаи ин мусобиқа Қосим Раҷабмадов, корманди масъули Кумитаи ҳолатҳои фавқулодаи Тоҷикистон пирӯз шуд ва бо мукофоти аслӣ — Ҷоми Пойтахт, медали тилло ва туҳфаҳо  сарфароз гашт. Ба Раҷабмадов барои ҷойи дуюм ҷому медали нуқра ва туҳфаҳо супурда шуданд.
Амирҷон Убайдуллоев, бародари хурдии Ҷамолиддин, ки муовини мудири шуъбаи молияи Дастгоҳи иҷроияи президенти Тоҷикистон аст, ҷойи сеюм ва Баҳодур Ҳомидов, прокурори ноҳияи Синои Душанбе, ҷойи чорумро гирифтанд. Ҳарду бо ҷому медалҳои биринҷӣ ва туҳфаҳо мукофотонида шуданд. 
Ба ҳамаи ширкаткунандагони мусобиқа ва ҳайати доварон сертификатҳои Кумитаи байналмилалии олимпӣ ва Кумитаи миллии олимпии Тоҷикистон, инчунин туҳфаҳои Ширкати мобилии «Мегафон” супурда шуданд.