Вохӯрии ҳайати сарситоди сарҳадбононии Тоҷикистону Ӯзбекистон

 
Хуҷанд, 27.04.2015. (АМИТ “Ховар”,Абдуаҳад Шарифзода).-Дирӯз дар шаҳри Хуҷанд аввалин вохӯрии байни сардорони сарситоди қӯшунҳои сарҳадии Ҷумҳуриҳои Тоҷикистону Ӯзбекистон  доир гашт. Мулоқоти ҳайатҳои  расмии дуҷониба дар Қасри Арбоб таҳти роҳбарии  муовини аввали фармондеҳи қӯшунҳои сарҳадӣ -сардори штаби генералии қӯшунҳои сарҳадии Кумитаи амнияти миллии Ҷумҳурии Тоҷикистон полковник  Х.Сафаров ва муовини аввали фармондеҳи қӯшунҳои сарҳадӣ- сардори штаби генералии қӯшунҳои сарҳадии Хадамоти амнияти миллии Ҷумҳурии Ӯзбекистон генерал майор Н.Усмонбеков баргузор гардид.                                                
  Зимни вохӯрии ҳайатҳои дуҷониба натиҷабардорӣ оид ба ҷараёни масъалаи муҳофизати марзи давлатӣ миёни ду кишвар, гузаронидани корҳои пешгирикунанда байни аҳолии деҳоти ҳаммарз, пешгирии ғайриқонунии убури сарҳади давлатӣ ва ҳамчунин дар ҳолати ба вуҷуд омадани муаммоҳо ҳангоми муҳофизати хатти сархад ҳал намудани онҳо дар сатҳи роҳбарони минтақаҳои сарҳадӣ ва  риояи шартҳои протоколҳои ба имзорасидаи байнидавлатӣ  оид ба муҳофизати сарҳадро баррасӣ намуданд.          
Мулоқот бо имзои қарордоди ҳамкориҳои судманди дуҷониба ба анҷом расид.