Ғалабаи навбатии «Истиқлол» дар Истаравшан

Душанбе, 19.05.2015. (АМИТ»Ховар», Рафоати Абдулҳамид).- Дар бозии ҷамъбастии даври шашум, ки рӯзи душанбеи 18-уми  май дар варзишгоҳи марказии шаҳри Истаравшан баргузор шуд, чемпиони феълии Тоҷикистон “Истиқлол”-и Душанбе бар  “Далерон- Ӯротеппа”  и Истаравшан бо ҳисоби 1 бар 0 ғолиб шуд. Голи ягонаи меҳмононро дар дақиқаи 4 вохӯрӣ Хосе Баллестер ба ҳадаф расонд.
Бино ба иттилои Федератсияи футболи Тоҷикистон ин ғалабаи шашуми пайдарҳами чемпиони секаратаи Тоҷикистон дар чемпионати имсола мебошад. Шогирдони Мубин Эргашев аз 6 бозӣ 18 имтиёзи имкониятдоштаро соҳиб шуда, дар садри ҷадвали мусобиқа қарор доранд. “Истиқлол” нисбат ба витсе-чемпиони мамлакат “Хайр”-и Ваҳдат, ки зинаи дуюми ҷадвали мусобиқаро ишғол мекунад, панҷ имтиёз зиёд дорад. Гузашта аз ин, футболбозони дастаи пойтахт ба дарвозаи ҳарифон дар 6 бозӣ, аз ҳама бештар 27 гол зада, аз дарвозаи худ аз ҳама кам, ҳамагӣ ду тӯб гузарониданд.
Бозии навбатии худро чемпиони мо дар доираи бозиҳои 1/8 ниҳоии Ҷоми КФО-2015 рӯзи 26- уми  май бо “Ал- Ваҳда”-и Сурия мегузаронад. Ин вохӯрӣ соати 20.00 дар Варзишгоҳи марказии ҷумҳуриявӣ доир мегардад.
Дар доираи бозиҳои чемпионати Тоҷикистон “Истиқлол” рӯзи 29- уми май дар майдони худ “Регар- ТадАз”- и Турсунзодаро қабул мекунад. Ин вохӯрӣ бо сабаби иштироки “Истиқлол” дар Ҷоми КФО аз 24- ум  ба 29 — уми май гузаронида шуд.
 Ҳаминро зикр мекунем, ки дастаи шаҳри Турсунзода низ дар айни ҳол дар бозиҳои чемпионати имсолаи кишвар байни дастаҳои лигаи олӣ ба мағлубият дучор нашудааст.