Қайроққум: Баргузории ҷаласаи котибони Шӯроҳои амнияти СААД
Қайроққум, 21.05.2015. (АМИТ “Ховар”, Абдуаҳад Шарифзода).-Дирӯз, 20 май дар шаҳри Қайроққуми вилояти Суғд ҷаласаи Кумитаи котибони шӯроҳои амнияти Созмони Аҳдномаи Амнияти Дастаҷамъӣ (СААД) баргузор гардид.
Дар кори ҷаласа, ки таҳти раёсати Котиби Шӯрои амнияти Ҷумҳурии Тоҷикистон генерал-полковник Абдураҳим Қаҳҳоров доир гашт, котиби Шӯрои Созмони Аҳдномаи Амнияти Дастаҷамъӣ Николай Бордюжа ва котибони шӯроҳои амнияти ҷумҳуриҳои Тоҷикистон, Арманистон, Беларус, Қазоқистон, Қирғизистон ва Федератсияи Русия иштирок намуданд.
Зимни баргузории ҷаласа ҷонибҳо оид ба масъалаи амнияти байналмилалӣ ва тадбирҳои кишварҳои узви СААД ҷиҳати бартараф кардани таҳдид ва хатарҳо барои минтақаи амнияти дастҷамъӣ, оид ба вазъият дар шарқи Аврупо, Осиёи Марказӣ, Қафқози шимолӣ ва Шарқи Наздик, инчунин табодули андешаҳо ҷиҳати мушкилоти фарогир, ки ба таъмини амнияти минтақаи СААД ва манотиқи атрофи он тааллуқ дошта ва ҳамчунин раванди ҳаводиси Афғонистон ва таъсири он ба минтақаи таҳти уҳдадории СААД мавриди баррасӣ қарор гирифтанд.
Дар интиҳои ҷаласа ҳалномаи нақшаи тавсияҳои намояндаҳои кишварҳои узви СААД оид ба сиёсати хориҷӣ, амният ва мудофиа барои нимсолаи дуввуми соли 2015 ва нимсолаи аввали соли 2016, ҳалномаи протоколӣ оид ба замон ва баргузории нишасти навбатии ҷаласаи Кумитаи котибони шӯроҳои амнияти Созмони Аҳдномаи Амнияти Дастаҷамъӣ ба имзо расид.
Ҷаласа бо нишасти хабарӣ анҷом ёфт.