Ҳарифони футболбозони навраси Тоҷикистон

Душанбе, 22.05.2015. (АМИТ «Ховар»).- Имрӯз, 22 май, дар Академияи клуби футболи «Истиқлол» — и Душанбе, воқеъ дар шаҳраки Алмосии ноҳияи Ҳисор, Ҷашнвораи минтақавии футболи Конфедератсияи футболи Осиё (U 14) барои кишварҳои Осиёи Марказӣ ва Ҷанубӣ оғоз меёбад, ки дар он дастаҳои мунтахабаи наврасони Эрон, Афғонистон, Ҳиндустон, Шри Ланка, Непал ва Покистон иштирок менамоянд.Тавре ки аз дафтари матбуоти Федератсияи футболи Тоҷикистон хабар доданд, 21 май дар маҷлисгоҳи Академияи футболи «Истиқлол» ҳамоиши танзимотӣ бо иштироки намояндагони дастаҳои иштироккунандаи ҷашнвора баргузор гардид. Ҳамоҳангсози ҷашнвораи Конфедератсияи футболи Осиё дар Тоҷикистон доктор Шомил Комил Муҳаммад ал Ҷадҷонӣ (Ироқ) зимни суханрониаш изҳор дошт, ки «Тоҷикистон бори нахуст ҷашнвораи футболи Конфедератсияи футболи Осиёро дар кишвари худ доир менамояд. Мақсади асосии ҷашнвора барои варзишгарони ҷавон фароҳам овардани шароити пайдо намудани таҷриба ва омодагирӣ ба мусобиқоти оянда таҳти васояти Конфедератсияи футболи Осиё мебошад». Сардори шуъбаи футболи наврасони Федератсияи футболи Тоҷикистон Анваршо Мирзоев ба иштирокдорони ҷашнвора муроҷиат карда, чунин гуфт: «Мехостам, ки ҳамаи шуморо аз ҷониби роҳбариятамон табрик гӯям. Мо басо шодем, ки Конфедератсияи футболи Осиё Тоҷикистонро макони гузаронидани ҷашнвора дар минтақаамон интихоб кардааст. Ба ҳамаи иштироккунандагони ҷашнвора муваффақиятҳои бештареро орзу дорам». Сипас маросими қуръапартоии дастаҳо баргузор шуд. Гурӯҳи «А» иборат аз дастаҳои мунтахаби Тоҷикистон, Эрон, Ҳиндустон ва Шри Ланка мебошад. Гурӯҳи «Б» — ро дастаҳои мунтахаби Афғонистон, Непал ва Покистон ташкил медиҳанд.Дастаи наврасони Тоҷикистон имрӯз, 22 май, бо дастаи Эрон вомехӯрад. Дар даври дуюм футболбозони Тоҷикистон 23 май бо дастаи Ҳиндустон ва 25 май бо дастаи Шри Ланка қувваозмоӣ менамоянд. Ёдовар мешавем, ки ҳамаи бозиҳои ҷашнвора дар майдони Академияи «Истиқлол» сурат мегиранд.