Ҳунарпешагони Театри лӯхтак ба Бишкек мераванд

Душанбе, 28.05.2015. (АМИТ «Ховар»,  Елена  Батенкова).- Театри  давлатии  лӯхтаки   шаҳри  Душанбе  аз  27  май  то  3  июн  дар  Ҷашнвораи  якуми  байналмилалии   театрҳои  лӯхтаки «Так- теке»  дар  шаҳри  Бишкеки  Қирғизистон  иштирок  менамояд.
Назар  ба  хабари роҳбарияти театр,  актёрони тоҷик  намоишномаи «Шуча» аз  рӯи  асари Владимир  Масловро  манзури тамошобинон  менамоянд. Коргардони намоишнома Ходими  шоистаи  санъат Зафар  Ҷаводов  мебошад. 
Ба  гуфтаи ташкилкунандагони  ин  чорабинӣ,  ҷашнвора имконияти   нодире   барои  густариши табодули  фарҳангӣ  дар  бахши  санъати  имрӯзаи  театрҳои  лӯхтак  маҳсуб  меёбад. 
Дар  ҷашнвора  баробари актёрони тоҷик  ҳунарпешагони Қирғизистон,  Русия ва  Қазоқистон  низ  иштирок  менамоянд.