Ҷаласаи роҳбарони идораҳои зиддимухаддиротии АҚТ дар Душанбе

Душанбе, 27. 05. 2015. (АМИТ «Ховар», Мавҷуда Анварӣ).-Дирӯз дар Душанбе ҷаласаи навбатии шарҳии роҳбарони идораҳои зиддимухаддиротии Афғонистон, Қирғизистон ва Тоҷикистон «Ташаббуси АҚТ» баргузор гардид, ки дар ҷараёни он масъалаҳои мубориза бар зидди муомилоти ғайриқонунии маводи нашъаовар ва идораи сарҳад байни Ҷумҳурии Исломии Афғонистон, Ҷумҳурии Қирғизистон ва Ҷумҳурии Тоҷикистон муҳокима гардиданд.
          Инчунин дар чаҳорчӯби Барномаи минтақавӣ барои Афғонистон ва кишварҳои ҳамсоя «Медиа-форум»-и минтақавӣ таҳти унвони «Огоҳонидани аҳолӣ доир ба тадбирҳои андешидаи Ҳукумати Ҷумҳурии Тоҷикистон дар бахши муқовимат бо гардиши ғайриқонунии маводи мухаддир» дар шаҳри Душанбе гузаронида шуд.          
         Мақсади асосии баргузор намудани медиа-форум огоҳ намудани ҷомеа аз оқибатҳои маводи мухаддир, мубориза бо гардиши ғайриқонунии маводи мухаддир дар минтақа ва тақвияти ҳамкориҳо бар зидди муомилоти ғайриқонунии маводи нашъаовар, инчунин беҳтар намудани мубодилаи иттилоот байни кишварҳои аъзо арзёбӣ гардид.