Ҷамъбасти чорабиниҳои “30 рӯзи ҷавонӣ”

Душанбе, 29.05.2015 (АМИТ «Ховар», Фарзонаи Давлат).-Имрӯз дар маркази фарҳангии ҷавонон  — “Ориёно” бо баргузории як чорабинии фарҳангӣ чорабиниҳои “30 рӯзи ҷавонӣ”, ки бахшида ба Рӯзи ҷавонон эълон гардида буданд, ҷамъбаст гардиданд. 
Дар чорабинӣ раиси Кумитаи ҷавонон, варзиш ва сайёҳӣ Аҳтам Абдуллозода ҳамаи ҷавонон ва иштирокдоронро табрик намуд. 
Номбурда изҳор дошт, ки 23 май эълон гардидани  Рӯзи ҷавонон аз он шаҳодат медиҳад, ки Ҳукумати мамлакат бо роҳбарии Президенти кишвар Эмомалӣ Раҳмон нисбат ба ҷавонон таваҷҷуҳи хосса зоҳир менамояд.
Ҳамзамон дар чорабинӣ Аҳтам Абдуллозода аз дастгирии роҳбарияти олии мамлакат нисбат ба ҷавонон ёдовар гардида, иштирокдорон ва ҷавононро ба аз бар намудани илмҳои замонавӣ даъват кард.
Дар чорабинӣ аз ҷониби роҳбарияти Кумита Аҳтам Абдуллозода ба як гурӯҳ кормандони васоити ахбори омма,  кормандони дастгоҳи марказӣ ва зерсохторҳои кумита барои иштироки фаъолона дар чорабиниҳои фарҳангӣ — маърифатӣ дар доираи “30 рӯзи ҷавонӣ” бахшида ба Рӯзи ҷавонони Тоҷикистон таҳти унвони “Ҷавонон — давомдиҳандагони ҳадафҳои олии кишвар” “Сипоснома” тақдим гардид.
Инчунин дар маросими ҷамъбастии чорабиниҳои “30 рӯзи ҷавонӣ” ба гирандагони Стипендияи президентӣ маблағи пулӣ ва шаҳодатнома дода шуд.
Лозим ба ёдоварист, ки  чорабиниҳои идона  бахшида ба Рӯзи ҷавонон дар тӯли як моҳ идома карда, дар тамоми воситаҳои ахбори омма инъикоси  васеъ ёфтанд.