Ҷойи ҳуқуқи Тоҷикистон дар низоми ҳуқуқии ҷаҳони муосир

Душанбе, 28. 05. 2015. (АМИТ «Ховар», Мавҷуда Анварӣ).-Масъулини Маркази миллии қонунгузории назди Президенти Ҷумҳурии Тоҷикистон таҳти унвони «Ҷойи ҳуқуқи Ҷумҳурии Тоҷикистон дар низоми ҳуқуқии ҷаҳони муосир» конфронси илмӣ-амалии ҷумҳуриявиро доир намуданд. 
Дар кори конфронс доираи васеи намояндагони ҳокимияти давлатии иҷроия, қонунгузорӣ, судӣ, ҳифзи ҳуқуқ ва муассисаҳои илмӣ иштирок намуданд. Зимни суханронӣ мутахассисон ва коршиносону олимони соҳаи ҳуқуқ дар атрофи ҷойгоҳи ҳуқуқии Ҷумҳурии Тоҷикистон дар низоми ҳуқуқии ҷаҳон, табиати ҳуқуқӣ ва моҳияти низоми ҳуқуқӣ, низоми ҳуқуқии романию олмонӣ, низоми ҳуқуқии умумӣ, мусулмонӣ, одатӣ, тавсияи умумии дигар низомҳои муосири ҳуқуқ ва амсоли инҳо таҷдиди назар намуданд. 
Дар конфронс ҳамчунин масъалаҳои наздикшавӣ, аз ҷумла ҳамоҳангсозӣ ва якҷояшавӣ, таъсиррасонӣ ва таҷассуми меъёрҳои ҳуқуқ дар қонунгузорӣ, таҳлили муқоисавӣ-ҳуқуқии низоми соҳаҳои алоҳидаи ҳуқуқ, ба мисли ҳуқуқи конститутсионӣ, ҳуқуқи ҷиноятӣ, маъмурӣ, андоз, гумрукӣ, соҳибкорӣ, ҳуқуқи оилавӣ дар вобастагӣ ба таҷрибаи як силсила кишварҳои пешрафтаи ҷаҳон мавриди таҳлилу баррасӣ қарор дода шуданд.