Баргузории намоишгоҳи минтақавии савдо Суғд-2015

Хуҷанд, 13.05.2015. (АМИТ Ховар, Абдуаҳад Шарифзода).-Мутобиқ ба қарори раиси вилояти Суғд моҳи июли соли равон дар шаҳри Хуҷанд намоишгоҳи минтақавии савдо Суғд-2015 баргузор мешавад. Тавре ки дар ин бора сомонаи расмии раиси вилоят иттилоъ медиҳад, ҳадаф аз намоишгоҳи мазкур-дастгирии рушди савдои байналмилалӣ, баланд бардоштани неруи содиротӣ, ба роҳ мондани ҳамкории судманд бо давлатҳои хориҷии дуру наздик, ҷалби сармоягузорӣ ва воридоти технологияҳои муосир, инчунин ба маъраз гузоштани намудҳои гуногуни маҳсулоти кишоварзию саноатӣ ва маҳсули ҳунарҳои мардумӣ мебошад.  Инчунин дар доираи баргузории намоишгоҳи минтақавии савдо, ки 24-25 июл дар назар аст, Форуми чоруми минтақавии тиҷоратию сармоягузорӣ дар мавзӯи «Неруи содиротӣ ва рушди савдои байналмилалӣ» ва озмуни вилоятии «Маҳсулоти беҳтарин» доир хоҳад гашт.