Биснес-форуми Тоҷикистону Олмон дар Душанбе

Душанбе, 15. 05. 2015. (АМИТ «Ховар», Кристина Эрлих).-17 майи соли ҷорӣ роҳбари кумитаи иҷроияи шарқии иқтисодиёти олмонӣ профессор Райнер Линднер барои иштирок дар бизнес-форуми соҳибкорони Тоҷикистону Олмон, ки 18 май дар шаҳри Душанбе баргузор мегардад, бо  сафари корӣ ба Тоҷикистон ташриф меорад.
Тавре ки ба хабарнигори АМИТ «Ховар» Сафири фавқулода ва мухтори Ҷумҳурии Тоҷикистон дар Олмон Маликшо Неъматов иттилоъ дод, Р. Линднер дар доираи сафари худ бо Сарвазир ва вазири корҳои хориҷии кишвар вохӯрӣ намуда, дар ифтитоҳи  бизнес -форуми Тоҷикистону Олмон иштирок хоҳад кард.
Ба гуфтаи сафир, ҳайати олмонӣ аз 25 нафар соҳибкору сармоягузор ва намояндаи доираҳои тиҷоратӣ иборат мебошад. Зимни вохӯрии соҳибкорони Тоҷикистону Олмон мубодилаи иттилоот, муаррифии лоиҳаҳои бузург ба нақша гирифта шудааст, ки ин барои ҳамкориҳои оянда такон бахшида, ба иқтисодиёти Тоҷикистон сармояи олмониро ҷалб менамояд.