Боздошти иҷозатномаҳои қалбакӣ барои риш

Душанбе, 19.05.2015. (АМИТ «Ховар»).- Моҳи апрели соли 2015 аз ҷониби шахсони номаълум бо истифода аз техникаи компютерӣ ҳуҷҷати баръало сохтаи «Иҷозатнома барои риш ва ҳиҷоб» ба номи «Бойматов Иномҷон Шаҳобович» ва «Ахмедова Нигора Рустамовна» сохта шуда, шакли онҳо бо эълони бардурӯғ дар хусуси он, ки гӯё чунин «иҷозатномаҳо» аз ҷониби Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон бо ситонидани 250 сомонӣ маблағ дода мешаванд, дар сомонаҳои интернетӣ паҳн гардидааст. 
Аз Прокуратураи генералии ҷумҳурӣ ба АМИТ “Ховар” иттилоъ доданд, бо назардошти он, ки ҳаракатҳои шахсони номаълуми «Иҷозатнома барои риш ва ҳиҷоб»-ро сохтакорикарда ва эълони бардурӯғро паҳнкарда ба барангехтани кинаю адовати динӣ ва паст задани шаъну эътибори миллии Ҷумҳурии Тоҷикистон равона шудаанд ва бинобарин дар ин ҳаракатҳо баръало аломатҳои ҷиноятҳои барангехтани кинаю адовати динӣ ва сохтакорӣ бо истифодаи техникаи компютерӣ дида мешаванд, оид ба ҳолати мазкур 18 майи соли 2015 аз ҷониби Прокуратураи генералии Ҷумҳурии Тоҷикистон бо моддаҳои 189 қисми 1 ва 340 қисми 2, банди «в»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардид.