«Чодари найранг» дар театри Лоҳутӣ

Душанбе, 21. 05. 2015. (АМИТ «Ховар», Мавҷуда Анварӣ).-Имрӯз соати 17.30 дар Театри давлатии академӣ-драмавии ба номи Абулқосим Лоҳутӣ нахустнамоиши «Чодари найранг», ки ба соли оила бахшида шудааст, пешкаши тамошобинон хоҳад гашт.
Тибқи иттилои Муҳиддин Зоидов, иҷрокунандаи вазифаи директори театри мазкур «Чодари найранг» аз рӯи асар ва коргардонии Тӯрахон Аҳмадхон рӯи саҳна омадааст. Дар нақшҳои асосӣ ҳунармандони шинохта Қиёмиддини Чақал, Света Наврӯзова, Ортиқ Қодир ва Зулхумори Иброҳим ҳунарнамоӣ мекунанд.
«Дар намоишнома мо кӯшиш намудем, ки бештар ба масъалаҳои маърифати зан ва оиладорӣ, омодагии ҷавонон ба ҳаёти мустақилона, баланд бардоштани маърифати оиладорӣ, тарбияи насли наврас дар руҳияи ватандӯстию эҳёкорӣ, ҳифзи оилаю модар ва кӯдак, пешгирии пошхӯрии оилаҳои ҷавон, ҷилавгирӣ аз ифротгароӣ ва тақлид ба либоспӯшии бегонаю дигар масъалаҳои мубрами рӯз диққати бештар диҳем. Тавре ки медонем, соли 2015-ро Президенти кишвар Эмомалӣ Раҳмон Соли оила эълон кардааст ва мо ин намоишномаро маҳз ба ҳамин мавзӯъ бахшидем», — иброз намуд коргардони намоишнома Тӯрахон Аҳмадхон.