Чорабиниҳо бахшида ба Рӯзи ҷавонони Тоҷикистон

Душанбе, 21.05.2015. (АМИТ »Ховар», Рафоати Абдулҳамид).- Дар доираи чорабиниҳои таҷлили Рӯзи ҷавонони Тоҷикистон дар қаламрави вилоят як силсила чорабиниҳо гузаронида шуд.
Тавре ки Хадамоти матбуоти раиси вилояти Суғд хабар додааст,  бобати таҳкими фаъолияти эҷодии ҷавонон, ҳисси ватандӯстӣ ва худогоҳии миллӣ, дарёфт ва ба рӯи саҳна овардани истеъдодҳои нав тадбирҳои зарурӣ роҳандозӣ гардида, озмуни «Стипендияи раиси вилоят барои донишҷӯёну аспирантҳои мактабҳои олӣ», озмуни вилоятии сурудҳои ватанпарастонаи «Суруди сарбоз», Рӯзи дарҳои кушод дар қисмҳои низомӣ ва дидбонгоҳҳои сарҳадӣ, ҳашари ҷавонон барои беҳдошти фазои экологӣ, Дави миллӣ таҳти шиори «Ҷавонон ҷонибдори тарзи ҳаёти солим!», мусобиқаҳои пойгаи аспӣ, шиноварӣ, ярмаркаи туристӣ, таҷлили Рӯзи байналмилалии ҳамшираи шафқат ва аёдати ҷавонони маъюбу камбизоат ба вуқӯъ пайвастанд.
Ҳамзамон моҳи апрели соли 2015 маҷмӯаи мақолаҳои беҳтарини 50 нафар олим ва муҳаққиқи ҷавони вилоят нашр шуд, ки аз маърӯзаҳои илмии беҳтарин фароҳам оварда шудааст.