Даври интихобии озмуни «Пули забони чинӣ»

Душанбе, 21.05.2015. (АМИТ «Ховар», Раъно Нусратуллозода).- Бо ибтикори сафорати ҶМЧ дар ҶТ, Маркази Конфутсии назди Донишгоҳи миллии Тоҷикистон ва Гимназияи «Кафолат» — и шаҳри Душанбе 20 май дар гимназияи мазкур таҳти шиори «Кӯдакон гулдастаҳои олам» даври интихобии пайти 8 уми озмуни «Пули забони чинӣ» баргузор шуд.Дар маросим намояндагони корпуси дипломатии сафорати ҶМЧ, Маркази Конфутсий, ҳамчунин меҳмонони сершумор ширкат доштанд. Дар толори гимназия даври интихобии озмун дар амри донистани забони чинӣ барои хонандагони Литсей интернати президентӣ, мактаби миёнаи таҳсилоти умумии № 94, мактаби байналмилалии шаҳри Душанбе, гимназияи № 1, гимназияи «Кафолат» — и Маркази Конфутсий баргузор шуд. Дар анҷоми озмун хонандагони макотиби зикршуда барномаи консертиро манзури меҳмонон намуданд.