Душанбе наздики 700 сарбоз ба Артиш фиристод

   Душанбе, 07.05.2015.(АМИТ «Ховар», Марзия Саидзода).- Нақшаи даъвати баҳории наваскарон ба сафи Қувваҳои мусаллаҳи кишвар дар пойтахт  пеш аз муҳлат иҷро гардид. Сардори шуъбаи даъват ва тайёрии ҷавонон ба хизмати ҳарбии комиссариати ҳарбии шаҳри Душанбе, полковник Саид Каримов дар суҳбат ба хабарнигори АМИТ «Ховар» гуфт, даъвати баҳории ҷавонон ба сафи Қувваҳои мусаллаҳи кишвар дар пойтахт аз оғоз  муташаккилона ҷараён гирифта, аз чор навоҳии Душанбе 693 нафар наваскар барои хизмати содиқона ба ватан ба сафи Артиши миллӣ фиристода шуд. 
     Полковник Каримов афзуд, ки  дар омода ва гусели наваскарон ба сафи Қувваҳои мусаллаҳи кишвар  комиссариати ҳарбии шаҳри Душанбе дар ин давра бо Раёсати Вазорати корҳои дохилӣ дар шаҳри Душанбе, шуъбаҳои он дар ноҳияҳои пойтахт, прокуратура, раисони шаҳраку маҳаллаҳо ҳамкории густурдаро ба роҳ монд. 
     Инчунин бо роҳи ихтиёрӣ гусел кардани чавонон ба сафи Артиши миллӣ бо иштироки собиқадорони Ҷанги дуюми ҷаҳон, ҷанговарони башардӯст, волидайни ҷавонон ва дигар намояндагони ҷомеа мулоқот доир  шуда, дар он доир ба ҳифзи марзу буми Ватан, далерию ҳушёрӣ ва содиқона хизмат кардан ба ватан сухан рафт.