Хатти оби нӯшокӣ дар деҳаи Туто

Душанбе, 18.05.2015. (АМИТ “Ховар”, Раъно Нусратуллозода).-Аз ҷониби Муассисаи давлатии Маркази идораи лоиҳаи “Рушди чорводорӣ ва чарогоҳҳо” дар ҳамоҳангӣ бо Вазорати кишоварзӣ чорабиниҳои мушаххас амалӣ мешаванд. 
Тавре ки  намояндаи лоиҳа Муҳриддин Музаффаров иттилоъ дод, бо мақсади дидани ҳолати татбиқи лоиҳаҳо, ки аз ҷониби Ҳукумати Ҷумҳурии Тоҷикистон ва Фонди байналмилалии рушди кишоварзӣ роҳандозӣ гардидаанд,  боздиди  кории Сафири ИМА дар Ташкилотҳои СММ дар Рим  Дэвид Лейн ва намояндагони васоити ахбори омма аз давлатҳои хориҷӣ ва  созмонҳои байналхалқӣ дар ноҳияи Мӯъминобод сурат гирифт.  Меҳмонон дар маросими супоридани иншооти   хати оби нӯшокӣ дар деҳаи Туто, ки масофаи он 12 ҳазору 726 метрро ташкил дода, 287 хоҷагии деҳа пурра бо оби нушокӣ таъмин гардид, ширкат намуда, ба корҳои сохтмонии он ва сатҳу сифати оби тозаи нӯшокӣ, ки дар доираи татбиқи Лоиҳаи “Беҳсозии сатҳи зиндагӣдар Хатлон” сохта шудааст, баҳои баланд доданд. 
Инчунин  дар деҳаи Сангдараи болои ноҳияи Муъминобод клиникаи байторӣ  кушода шуд. 
Бояд зикр намуд, ки  дар доираи татбиқи Лоиҳаи “Беҳсозии сатҳи зиндагӣ дар Хатлон” Мақомоти худфаъолияти ҷамъиятии Лангар  бо 2 адад трактор бо олотҳои васлкунанда таъмин  шудааст. 
Дэвид Лейн аз  қитъаи боғи намунавии интенсивии себи навъҳои кадпаст дар хоҷагии деҳқонии “Хоҷаи нур”-и ноҳияи Мӯъминобод боздид намуда, ба технологияи интенсивии истифодашаванда баҳои баланд доданд. Инчунин меҳмонон дар деҳаи Ханатарош аз натиҷаҳои татбиқ ва ҷараёни корҳои лоиҳавӣ аз наздик шинос шуда, бо аҳолии деҳа вохӯриҳои судманд гузарониданд.