Конфронс оид ба пешгирии ҷинояткорӣ дар байни ноболиғон

Хуҷанд. 27.05.2015. (АМИТ “Ховар”, Абдуаҳад Шарифзода).-Муқовимат бо коррупсия, пешгирии қонуншиканӣ ва ҷинояткорӣ дар байни ноболиғон, шомилшавии онҳо ба ҳизбу ҳаракатҳои ифротгаро,- таҳти чунин унвон дирӯз дар маркази Суғд конфронси илми-амалӣ  доир гардид.   
Дар конфронс, ки дар Мактаби таҳсилоти миёнаи умумии №23-и шаҳри Хуҷанд баргузор гашт, муовини якуми вазири маориф ва илми ҶТ Раҳматулло Мирбобоев, муовини раиси вилоят Назира Ғаффорова, сардори Раёсати маорифи вилоят, ректорони мактабҳои олӣ, сардорони раёсат ва мудирони шуъбаҳои маорифи шаҳру ноҳияҳо, намояндагони мақомоти ҳифзи ҳуқуқ ва сохторҳои амниятӣ, сарварони муассисаҳои таълимӣ, омӯзгорони пешқадам ва собиқадорони соҳаи маориф иштирок доштанд. Муовини раиси вилояти Суғд Назира Ғаффорова вазъи риояи қонун дар муассисаҳои соҳаи маориф ва ҳамзамон ҷинояткорию қонунвайронкуниеро, ки аз ҷониби хонандагону омӯзгорон содир шудааст, мавриди таҳлил карор дод.  Раҳматулло Мирбобоев, муовини якуми вазири маориф ва илми ҶТ оид ба санадҳое, ки вобаста ба муқовимат бо коррупсия қабул шудаанд ва корҳое, ки дар самти татбиқи онҳо ба иҷро расидаанд, инчунин бартариҳои қабули довталабон ва баргузории олимпиадаҳои мактабӣ аз тариқи Маркази миллии тестӣ маълумот дода, ҷиҳати ислоҳи камбудиҳо, муқовимат бо коррупсия ва пешгирии амалҳои номатлуб дастурҳои мушаххас дод.
Иштирокдорони конфронс оид ба корҳои иҷрошуда дар самти пешгирии қонуншиканию ҷиноятсодиркунии ноболиғон, рӯ ба афзоиш доштани худкушӣ ва қасд ба ҷон кардани наврасону ҷавонон, ҳизбу ҳаракатҳои ифротгаро, содиршавии амалҳои коррупсионӣ дар соҳаи маориф ва роҳҳои пешгирии онҳо андешаҳои худро баён намуданд.