Консерти муштарак дар Иттифоқи композиторон

Душанбе, 06.05.2015. (АМИТ «Ховар»). — Дар толори консертии Иттифоқи конпозиторони Тоҷикистон консерти муштарак ва маҳфили фарҳангӣ баргузор гардид, ки дар он намояндагони аҳли фарҳанг, аз қабили шоирону нависандагон, арбобони ҳунар, эҷодкорону мусиқишиносон ва донишҷӯёну толибилмон иштирок намуданд. 
Раиси Иттифоқи конпозиторони Тоҷикистон Қудратулло Ҳикматов иттилоъ дод, ки дар ин чорабинии фарҳангӣ ҷавонони лаёқатманд ва толибилмони Консерваторияи миллии Тоҷикистон ба номи Т. Сатторов асарҳои конпозиторони маъруфи кишвар ва сатҳи ҷаҳонӣ, ба мисли Толиб Шаҳидӣ, Қудратулло Ҳикматов, П. Чайковский, В.А. Мотсар, И.С. Бах ва дигаронро иҷро намуданд, ки онҳо аз ҷониби аҳли толор бо завқ ва хуш пазируфта шуд.
Дар ин маҳфил компазиторони ҷавон, аз ҷумла Диана Салиқова оҳанги хешро барои виолончел ва фортопиана иҷро намуд, ки аз ҷониби мусиқишиносон баҳои баланд гирифт. 
Инчунин, нахустин бор намоиши оҳанги Қ. Ҳикматов-Соната барои фортопиана аз ҷониби донишҷӯи Донишгоҳи давлатии славянии Тоҷикистону Русия Лутфулло Юсупов, ки 11-сол дар мактаби махсуси мусиқавии  ба номи М. Атоев таҳсил кардааст, иҷро шуд. 
Ба ақидаи Қудратулло Ҳикматов чунин чорабиниҳои фарҳангӣ, бахусус мусиқӣ ба кас ғизои маънавӣ бахшида, ба тарбияи маънавии наврасону ҷавонон таъсири амиқ мегузорад. Зеро, баҳра бурдан аз таъсири асарҳои компазиторони маъруфи миллӣ ва сатҳи ҷаҳонӣ завқи эстетикии инсонро боло бурда, ӯро дар ҷаҳони маърифат ва орӣ аз ҳар гуна ифроту хурофот тарбия мекунад. Бо назардошти ҳамин, Раёсати Иттифоқи компазиторони Тоҷикистон тибқи нақшаи кории худ чунин маҳфилҳои фарҳангӣ ва мусиқиро дар оянда низ мунтазам баргузор менамояд.