Марҳилаи ниҳоии Спартакиада оғоз ёфт

Душанбе, 04.05.2015. (АМИТ «Ховар»,  Некрӯзи Муҳаммадсодиқ ).-Пас аз ҷамъбасти марҳилаи якум ва дуюм дар корти тенниси шаҳри Душанбе маросими расмии кушодашавии марҳилаи ниҳоии Спартакиадаи донишҷӯёни муассисаҳои таҳсилоти олии касбии кишвар бо иштироки 3000 ҷавону варзишгар оғоз ёфт. Дар ин бора ба АМИТ «Ховар» Наврӯз Қурбонов,  мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ иттилоъ дод. 
Дар чорабинӣ намояндагони Ҳукумати мамлакат, роҳбарияти кумитаҳои ҷавонон, варзиш ва сайёҳӣ, кор бо занон ва оила, Вазорати маориф ва илм  ширкат варзида, аз дубора эҳё гардидани Спартакиада истиқбол намуданд. 
Аҳтам Абдуллозода, раиси Кумитаи ҷавонон, варзиш ва сайёҳӣ  изҳор дошт: «Мо аз ин меболем, ки оммаи васеи варзишгарони тоҷик  аз рӯзҳои нахусти соҳибистиқлолӣ бо амри дил ва қарзи виҷдон дар аксар сабқатҳои сатҳашон бонуфузи байналмилалӣ ва Бозиҳои олимпӣ иштирок карда, шараф, обрӯ ва эътибори Ҷумҳурии Тоҷикистонро бо сари боло ҳифз карда истодаанд».
Дар чорабинии варзишӣ донишҷӯи курси 2-и Донишгоҳи технологӣ Орипова М. Муроҷиатномаи иштирокчиёни Спартакиада ба ҷавонони кишварро бо шиори «Варзиш- саҳнаи номуси миллат» ва «Ҷавонон давомдиҳандагони ҳадафҳои олии кишвар!» бо эҳсоси баланди ватандӯстӣ қироат намуд.
  Лозим ба ёдоварист, ки дар марҳилаи 1 ва 2 Спартакиада, ки дар давоми ду моҳ (март ва апрел) соли 2015 давом кард, донишҷўёни 33 муассисаи таҳсилоти олӣ (ВМКБ-1 адад, Хатлон-5 адад, Суғд-6 адад, Душанбе-20 адад, Рашт-1) иштирок намуданд. 
Марҳилаи ниҳоии Спартакиада аз рӯи 10 намуди варзиш сурат гирифта, то 23.май идома меёбад. Ғолибон дар Рӯзи ҷавонони  қадрдонӣ хоҳанд гардид.