Мулоқоти М. Ҷабборӣ бо В. Чикин

Душанбе,14.05.2015.(АМИТ «Ховар»).-Имрӯз муовини Cарвазири Ҷумҳурии Тоҷикистон Марҳабо Ҷабборӣ бо муаллифи лоиҳаи байналмилалии “Балет ва шаҳр: Тоҷикистон” Владимир Чикин дидор ва гуфтугу намуд. Зимни он масоили татбиқи лоиҳаи мазкур баррасӣ гардида, зикр шуд, ки Ҳукумати Тоҷикистон ҳамеша барои рушди соҳаҳои фарҳанг алалхусус балет таваҷҷуҳи хосса зоҳир менамояд. Дар навбати худ Владимир Чикин иброз намуд, ки ҳадафи асосии лоиҳаи “Балет ва шаҳр: Тоҷикистон” ин таблиғ намудани шукуфон кишвар дар сатҳи байналмилалӣ тавассути нишон додани аксҳои хотирмон бо иштироки гурӯҳи ҳунарии балети тоҷик дар пасманзари мавзеъҳои ҷаззоби шаҳри Душанбе бо бинову иншооти таърихиву муосир ва табиати хоса ба тамошобинон мебошад. Бояд ёдовар шуд, ки айни замон Владимир Чикин бо сафари 5-рӯзаи худ дар Тоҷикистон қарор дошта, интизор меравад, ки пас аз анҷоми корҳои тадорукотӣ дар пойтахти ҷумҳурӣ намоишгоҳи аксҳо ташкил шуда, ҳамчунин аксҳои мазкур дар сатҳи ҷаҳонӣ, аз ҷумла дар шаҳрҳои Москва, Брюгеи Шоҳигарии Белгия ва дигар кишварҳои Иттиҳоди Аврупо ба маърази тамошо гузошта шавад.